*अल्पवयीन दुचाकी चालकांविरुद्ध चंद्रपूर पोलिसांची धडक कारवाई; 65 वाहने जप्त, पालकांचे केले समुपदेशन*

*ज्योत्स्ना वानखेडे*

शहरातील वाढत्या अपघातांना आळा घालण्यासाठी आणि वाहतुकीला शिस्त लावण्यासाठी मा. पोलीस अधीक्षक, चंद्रपूर यांच्या निर्देशानुसार दिनांक:14/07/2026 रोजी चंद्रपूर शहरात अल्पवयीन दुचाकी चालकांविरुद्ध एक विशेष मोहीम राबविण्यात आली. या धडक मोहिमेत वाहतूक शाखेने नियमांचे उल्लंघन करणाऱ्या एकूण *65 अल्पवयीन मुलांकडून वाहने डिटेन (जप्त)* केली आणि ती वाहतूक शाखेत आणली.

या कारवाईनंतर, दिनांक :*14/07/2026 रोजी सायंकाळी 5:00 वाजता* सर्व 65 अल्पवयीन मुलांच्या पालकांना वाहतूक शाखेत बोलावण्यात आले होते. यावेळी मा. पोलीस अधीक्षक तथा मा. अपर पोलीस अधीक्षक, चंद्रपूर यांनी स्वतः उपस्थित राहून सर्व पालकांना आणि मुलांना गंभीर इशारा देत मार्गदर्शन केले.

*पोलीस अधीक्षकांचे पालकांना आवाहन व समुपदेशन*

अल्पवयीन मुलांच्या हात वाहने देणे कायद्याने गुन्हा तर आहेच, शिवाय यामुळे मुलांच्या आणि इतर नागरिकांच्या जीवाला मोठा धोका निर्माण होतो. या दुष्परिणामांबाबत वरिष्ठ पोलीस अधिकाऱ्यांनी पालकांचे समुपदेशन केले.

*”पालकांनी आपल्या पाल्यांच्या सुरक्षेसाठी त्यांना वयाची 18 वर्षे पूर्ण होण्याआधी आणि वैध ड्रायव्हिंग लायसन्स (परवाना) नसताना कोणत्याही परिस्थितीत वाहन चालवण्यास देऊ नये,”* असे आवाहन यावेळी करण्यात आले.

समुपदेशनानंतर प्राथमिक स्वरूपात ही सर्व वाहने सोडण्यात आली.

*पुढील काळात होणार कठोर कायदेशीर कारवाई*

चंद्रपूर पोलीस दलातर्फे सर्व नागरिकांना याद्वारे सूचित व सतर्क करण्यात येत आहे की, ही केवळ एक जनजागृती व चेतावणी मोहीम होती. यापुढे जर कोणतेही अल्पवयीन मूल रस्त्यावर वाहन चालवताना आढळल्यास, *मोटर वाहन कायद्याच्या (Motor Vehicles Act) विविध कडक कलमांन्वये थेट कायदेशीर कारवाई करण्यात येईल.*

यामध्ये वाहन मालक आणि पालकांवरही गुन्हे दाखल होऊ शकतात, याची नोंद घ्यावी.

> *”आपल्या मुलांचे भविष्य आणि आयुष्य मौल्यवान आहे. त्यांना अल्पवयीन असताना वाहने देऊन त्यांचा जीव धोक्यात घालू नका. चंद्रपूर पोलिसांना शहर सुरक्षित व अपघातमुक्त ठेवण्यासाठी सहकार्य करा.”*

> *— पोलीस प्रशासन, चंद्रपूर*

*(अमोल बारापात्रे)*

पोलीस निरीक्षक

जिल्हा वाहतूक नियंत्रण शाखा,

चंद्रपूर