चंद्रपूरच्या औद्योगिक विकासासाठी आमदार किशोर जोरगेवार यांचा पुढाकार.

गडचिरोलीच्या धर्तीवर उद्योगांना प्रोत्साहनपर सवलती, स्थानिकांना रोजगार आणि प्रलंबित रस्त्यांची कामे पूर्ण करण्याची मागणी

*Jyotsna Wankhede*: नैसर्गिक संपत्तीची मुबलकता, मोठे औद्योगिक प्रकल्प आणि राज्याच्या अर्थव्यवस्थेत महत्त्वाचे योगदान देणारा जिल्हा अशी चंद्रपूरची ओळख असतानाही औद्योगिक विकासाच्या पुढील टप्प्यासाठी आवश्यक असलेल्या प्रोत्साहनाचा अभाव जाणवत आहे. या पार्श्वभूमीवर चंद्रपूरच्या उद्योगांना गडचिरोलीच्या धर्तीवर समान प्रोत्साहनपर सवलती मिळाव्यात, मोठ्या उद्योगांमध्ये स्थानिक युवकांना रोजगारात प्राधान्य द्यावे, स्थानिक लघु व मध्यम उद्योगांना अधिकाधिक संधी मिळाव्यात आणि एमआयडीसीतील प्रलंबित रस्त्यांची कामे तातडीने पूर्ण करावीत, अशा महत्त्वपूर्ण मागण्या आमदार किशोर जोरगेवार यांनी राज्याचे उद्योग मंत्री उदय सामंत यांच्याकडे केल्या. उद्योगमंत्री यांच्या उपस्थितीत झालेल्या बैठकीत या मागण्यांवर सकारात्मक चर्चा झाल्याने चंद्रपूरच्या औद्योगिक विकासाला नवी दिशा मिळण्याची अपेक्षा निर्माण झाली आहे.

चंद्रपूर हा राज्यातील प्रमुख औद्योगिक जिल्ह्यांपैकी एक असून कोळसा, वीज, सिमेंट, पोलाद यांसह विविध क्षेत्रांतील मोठे उद्योग येथे कार्यरत आहेत. जिल्ह्यात उपलब्ध असलेली नैसर्गिक साधनसंपत्ती, मनुष्यबळ आणि औद्योगिक पायाभूत क्षमता लक्षात घेता चंद्रपूरमध्ये नवीन उद्योग व गुंतवणुकीला मोठा वाव आहे. मात्र, उपलब्ध क्षमता आणि प्रत्यक्ष औद्योगिक विस्तार यामध्ये अजूनही मोठी तफावत असल्याची बाब आमदार जोरगेवार यांनी बैठकीत मांडली. चंद्रपूरच्या औद्योगिक क्षमतेचा अधिक प्रभावी वापर करून नवीन उद्योगांना आकर्षित करण्यासाठी तसेच विद्यमान उद्योगांच्या विस्ताराला चालना देण्यासाठी शासनाने विशेष प्रोत्साहन देणे आवश्यक असल्याचे त्यांनी स्पष्ट केले.

गडचिरोली जिल्ह्याला औद्योगिक विकासासाठी शासनाकडून विविध प्रोत्साहनपर सवलती व सुविधा उपलब्ध करून देण्यात येत आहेत. त्याच धर्तीवर चंद्रपूर जिल्ह्यातील उद्योगांनाही समान सवलती आणि सुविधा मिळाव्यात, ही आमदार जोरगेवार यांची बैठकीतील प्रमुख मागणी होती. चंद्रपूरला अशा स्वरूपाच्या सवलती मिळाल्यास नवीन गुंतवणूकदारांना जिल्ह्याकडे आकर्षित करता येईल, विद्यमान उद्योगांच्या विस्ताराला चालना मिळेल आणि त्यातून मोठ्या प्रमाणावर रोजगारनिर्मिती होऊ शकते, असा मुद्दा त्यांनी मांडला. या मागणीवर उद्योगमंत्री उदय सामंत यांनीही सकारात्मकता दर्शविल्याचे सांगण्यात आले.

औद्योगिक विकासाचा केंद्रबिंदू केवळ नवीन उद्योगांची स्थापना नसून त्या उद्योगांमधून निर्माण होणाऱ्या रोजगाराचा लाभ स्थानिक युवकांना मिळणेही तितकेच महत्त्वाचे आहे, याकडे आमदार जोरगेवार यांनी लक्ष वेधले. चंद्रपूरमधील युवकांकडे आवश्यक शैक्षणिक आणि तांत्रिक पात्रता असतानाही रोजगारासाठी त्यांना इतर शहरांकडे किंवा जिल्ह्याबाहेर जावे लागू नये, यासाठी मोठ्या उद्योगांमध्ये स्थानिक युवकांना प्राधान्य देण्याची व्यवस्था निर्माण करण्याची मागणी त्यांनी केली. उद्योगांच्या गरजेनुसार स्थानिक युवकांना प्रशिक्षण, कौशल्यविकास आणि रोजगाराभिमुख अभ्यासक्रम उपलब्ध करून दिल्यास उद्योगांनाही कुशल मनुष्यबळ मिळेल आणि स्थानिक तरुणांसाठी रोजगाराचे मोठे दालन खुले होईल, अशी भूमिका त्यांनी मांडली.

मोठ्या उद्योगांच्या विकासासोबतच चंद्रपूरमधील लघु व मध्यम उद्योगांना बळकटी देण्यावरही जोरगेवार यांनी भर दिला. मोठ्या उद्योगांना आवश्यक असलेल्या विविध वस्तू, सेवा, कंत्राटी कामे आणि औद्योगिक पुरवठा साखळीमध्ये स्थानिक उद्योजकांना अधिकाधिक संधी मिळाल्यास त्याचा थेट फायदा जिल्ह्यातील लघु व मध्यम उद्योगांना होऊ शकतो. स्थानिक उद्योजकांना मोठ्या उद्योगांशी जोडण्यासाठी आवश्यक सुविधा आणि धोरणात्मक सहकार्य उपलब्ध करून देण्याची मागणीही त्यांनी केली. यामुळे स्थानिक उद्योगांना बाजारपेठ मिळण्याबरोबरच रोजगाराच्या नव्या संधी निर्माण होण्यास मदत होणार आहे.

दरम्यान, एमआयडीसी परिसरातील प्रलंबित रस्त्यांच्या कामांचा प्रश्नही आमदार जोरगेवार यांनी बैठकीत उपस्थित केला. औद्योगिक क्षेत्रातील वाहतूक व्यवस्था सुरळीत राहण्यासाठी आणि उद्योगांच्या विस्ताराला चालना देण्यासाठी सक्षम पायाभूत सुविधा आवश्यक आहेत. मात्र, काही रस्त्यांची कामे प्रलंबित असल्याने उद्योग, उद्योजक तसेच वाहतूक व्यवस्थेला अडचणींचा सामना करावा लागत आहे. त्यामुळे एमआयडीसीतील प्रलंबित रस्त्यांची कामे तातडीने पूर्ण करण्याची मागणी त्यांनी केली. रस्ते आणि इतर पायाभूत सुविधा सक्षम झाल्यास विद्यमान उद्योगांना मोठी मदत होण्यासोबतच नवीन गुंतवणूकदारांसाठीही चंद्रपूर अधिक आकर्षक ठरेल, असे त्यांनी नमूद केले.

उद्योग मंत्री उदय सामंत यांच्या उपस्थितीत झालेल्या या बैठकीला जिल्हाधिकारी वसुमना पंत, अतिरिक्त जिल्हाधिकारी डॉ. नितीन व्यवहारे यांच्यासह संबंधित विभागांचे अधिकारी उपस्थित होते. तसेच भारतीय जनता पार्टीचे माजी महानगर अध्यक्ष सुभाष कासनगोट्टूवार, एमआयडीसी असोसिएशनचे अध्यक्ष मधुसूदन रुगंठा, संदीप भाटिया, विवेक चौधरी, प्रदीप बुक्कावार, शेख रहमान पटेल, खान, दात्रक, बलराम डोडाणी, तुषार सोम, अजय जयस्वाल आदींची उपस्थिती होती.

चंद्रपूरच्या औद्योगिक विकासाचा लाभ केवळ मोठ्या उद्योगांपुरता मर्यादित न राहता स्थानिक युवक, उद्योजक आणि सर्वसामान्य नागरिकांपर्यंत पोहोचावा, यासाठी आमदार किशोर जोरगेवार सातत्याने पाठपुरावा करीत आहेत. गडचिरोलीच्या धर्तीवर प्रोत्साहनपर सवलती मिळाल्यास चंद्रपूरमध्ये नवीन गुंतवणुकीचे मार्ग खुले होण्याबरोबरच स्थानिक रोजगारनिर्मितीला मोठी चालना मिळू शकते. स्थानिक उद्योगांना मोठ्या उद्योगांच्या पुरवठा साखळीत स्थान मिळाल्यास जिल्ह्याच्या अर्थव्यवस्थेलाही बळकटी मिळेल. त्यामुळे या बैठकीत मांडलेल्या मागण्यांवर शासनाकडून पुढील काळात कोणते निर्णय घेतले जातात, याकडे चंद्रपूरच्या औद्योगिक क्षेत्राचे लक्ष लागले आहे.