🎓 अनुसूचित जमातीच्या विद्यार्थ्यांसाठी भारत सरकार मॅट्रिकोत्तर शिष्यवृत्तीचे अर्ज भरण्यास सुरुवात

वाशिम (जिमाका) :एकात्मिक आदिवासी विकास प्रकल्प कार्यालय, अकोला अंतर्गत येणाऱ्या अकोला, वाशिम व बुलढाणा या तीन जिल्ह्यांतील सर्व शासकीय, निमशासकीय, अनुदानित व कायम विनाअनुदानित मान्यताप्राप्त महाविद्यालयांमधील अनुसूचित जमाती प्रवर्गातील विद्यार्थ्यांसाठी शैक्षणिक सत्र २०२६-२७ करिता भारत सरकार दहावीनंतरची (मॅट्रिकोत्तर) शिष्यवृत्ती व इतर योजनांचे अर्ज भरण्याची प्रक्रिया सुरू झाली आहे.

पात्र विद्यार्थ्यांनी ‘महाडीबीटी’ संगणकीय प्रणालीवर नवीन व नूतनीकरणाचे अर्ज विहित मुदतीत ऑनलाइन सादर करावेत, असे आवाहन प्रकल्प अधिकारी मोहनकुमार व्यवहारे यांनी केले आहे.

पात्र अभ्यासक्रम

उच्च माध्यमिक व पदवी/पदव्युत्तर अभ्यासक्रम :

११ वी, १२ वी, बी.ए., बी.कॉम., बी.एससी., एम.ए., एम.कॉम., एम.एससी., बी.एस.डब्ल्यू., एम.एस.डब्ल्यू., बी.लिब., एम.लिब., ए.एन.एम., जी.एन.एम., डी.एड., बी.एड. आणि एम.एड.

इतर व्यावसायिक अभ्यासक्रम :

उच्च व तंत्र शिक्षण विभाग, वैद्यकीय शिक्षण व औषधी द्रव्ये विभाग, कृषी विभाग, तसेच पशुधन, दुग्धव्यवसाय आणि मत्स्यव्यवसाय विभागाच्या अधिपत्याखालील सर्व मान्यताप्राप्त अभ्यासक्रम.

आवश्यक दाखले व कागदपत्रे

१️⃣ महाविद्यालयात शिकत असल्याचा दाखला (बोनाफाईड प्रमाणपत्र)

२️⃣ जातीचा दाखला

३️⃣ उत्पन्नाचे प्रमाणपत्र

४️⃣ अधिवास प्रमाणपत्र (रहिवासी दाखला)

५️⃣ शाळा किंवा महाविद्यालय सोडल्याचा दाखला (स्थानांतरण प्रमाणपत्र)

६️⃣ शैक्षणिक गुणपत्रिका

७️⃣ आवश्यक अभ्यासक्रमांसाठी जात पडताळणी प्रमाणपत्र (जात वैधता दाखला)

अर्ज प्रक्रिया व नियम

अधिकृत संकेतस्थळ :

मार्गदर्शक सूचना :

योजनेच्या सविस्तर कार्यप्रणालीसाठी विद्यार्थ्यांनी आदिवासी विकास विभागाचा १७ जानेवारी २०२२ रोजीचा शासन निर्णय पाहावा.

संकेतस्थळावर वेळोवेळी देण्यात येणाऱ्या सूचना व मुदतीचे पालन करणे सर्व विद्यार्थ्यांवर बंधनकारक राहील.

अनुसूचित जमातीच्या सर्व पात्र विद्यार्थ्यांनी विहित मुदतीत अर्ज भरून शिष्यवृत्ती योजनेचा लाभ घ्यावा, असे एकात्मिक आदिवासी विकास प्रकल्प कार्यालयाने कळविले आहे.