*चंद्रपूर पोलीस दलातर्फे शालेय विद्यार्थ्यांच्या सुरक्षेसाठी तयार करण्यात आलेल्या “सुरक्षा मंत्र” मार्गदर्शिका पुस्तिकेचा मा. विशेष पोलीस महानिरीक्षक श्री. संदीप पाटील यांच्या हस्ते भव्य शुभारंभ!*

चंद्रपूर जिल्ह्यातील शालेय विद्यार्थ्यांना विविध सामाजिक, कायदेशीर, ऑनलाईन व मानसिक ताण-तणावाच्या संकटांपासून सावध ठेवण्यासाठी तसेच त्यांच्यात सुरक्षिततेबाबत जनजागृती निर्माण करण्यासाठी पोलीस अधीक्षक, चंद्रपूर यांच्या संकल्पनेतून “सुरक्षा मंत्र” या विशेष मार्गदर्शक पुस्तिकेची निर्मिती करण्यात आली आहे. या डिजिटल व मुद्रित पुस्तिकेचा भव्य शुभारंभ मा. श्री. संदीप पाटील, विशेष पोलीस महानिरीक्षक, नागपूर परिक्षेत्र, नागपूर यांच्या शुभहस्ते संपन्न झाला.

“आधुनिक जगात एक पाऊल पुढे” या ध्येयाने प्रेरित होऊन ही पुस्तिका विद्यार्थी, पालक आणि शिक्षकांसाठी अत्यंत अनमोल व व्यावहारिक मार्गदर्शन ठरणार आहे. या पुस्तिकेत माहितीसह ई-बुक (E-Book) वापरकर्त्यांसाठी सोयीसाठी QR कोड देखील उपलब्ध करून देण्यात आले आहेत.

*’सुरक्षा मंत्र’ पुस्तिकेची प्रमुख उद्दिष्टे:*

1. *बालसंरक्षण व अधिकारांची जाणीव:* विद्यार्थ्यांना ‘चांगला स्पर्श वाईट स्पर्श’ (Good Touch & Bad Touch) यातील फरक सोप्या भाषेत समजावणे आणि लैंगिक अपराधांपासून बालकांचे संरक्षण करणाऱ्या पोक्सो (POCSO) कायद्याची बालसुलभ भाषेत माहिती देणे.

2. *सायबर व इंटरनेट सुरक्षितता:* वाढत्या डिजिटल युगात ऑनलाईन छळ, फोटो मॉर्फिंग, सोशल मीडियावरील धोके आणि सायबर आर्थिक फसवणुकीपासून सुरक्षित राहण्याचे उपाय सुचवणे.

3. *व्यसनमुक्ती व मानसिक आरोग्य:* अमली पदार्थांच्या (Drugs) गंभीर दुष्परिणामांविषयी जनजागृती करणे आणि विद्यार्थ्यांमध्ये परीक्षा व मानसिक ताण-तणाव व्यवस्थापन शिकवणे.

4. *वाहतूक नियम व रस्ता सुरक्षा:* वेगमर्यादा, हेल्मेट व सीटबेल्टचा वापर, ट्रॅफिक सिग्नल व रस्ता चिन्हांचे महत्व पटवून देऊन रस्ते अपघात रोखणे.

*’सुरक्षा मंत्र’ पुस्तिकेपासून होणारे प्रत्यक्ष फायदे:*

– *आत्मविश्वास व सुरक्षिततेची जाणीव:* विद्यार्थ्यांना स्वतःच्या अधिकारांची जाणीव होते, ज्यामुळे अनुचित प्रकार घडल्यास ते निर्भयपणे “नाही” म्हणण्यास आणि आवाज उठवण्यास सक्षम होतात.

– *तात्काळ हेल्पलाइन माहिती:* आणीबाणीच्या वेळी त्वरित मदत मिळवण्यासाठी पोलीस हेल्पलाइन क्रमांकांची सविस्तर माहिती.

– *पालक व शिक्षकांसाठी सुलभ मार्गदर्शक:* संवेदनशील विषयांवर मुलांशी संवाद साधण्यासाठी शिक्षक व पालक या पुस्तिकेचा व QR कोडचा प्रभावी वापर करू शकतात.

– *भयमुक्त व जबाबदार समाज निर्माण:* वाहतूक नियम व ऑनलाईन शिस्तीमुळे गुन्हेगारीला पायबंद बसून पोलीस आणि नागरिकांमधील विश्वासाचे नाते दृढ होते.

*आपत्कालीन हेल्पलाइन क्रमांक:*

आणीबाणी प्रतिसाद मदत: *DIAL 112*

दामिनी पथक: *7741098112*

चाइल्डलाइन: *1098*

सायबर हेल्पलाइन: *1930*

——————————————————————————————————

*संपर्क:*

Email : sp.chandrapur@mahapolice.gov.in | Website : http://www.chandrapurpolice.gov.in

Facebook : SP Chandrapur | Instagram : chandrapur_police | X : spchandrapur