*चंद्रपूर जिल्हा पोलीस दलातर्फे गणेशोत्सव शांतता व जनजागृती पुरस्कार सोहळा उत्साहात संपन्न!*

– विजेत्या आणि नियमांचे पालन करणारे गणेश मंडळांना रोख पारितोषिके व प्रशस्तीपत्रे प्रदान

– शांतता समिती, पोलीस मित्र, इको-प्रो-संस्था महापालिका, महावितरण व डी.जे. असोसिएशनचा कृतज्ञता सन्मान

यंदाचा सार्वजनिक गणेशोत्सव व विसर्जन सोहळा २०२६ चंद्रपूर जिल्ह्यामध्ये शांततेत, सुरक्षित, शिस्तबद्ध आणि सामाजिक सलोख्याच्या वातावरणात पार पडल्याबद्दल, उत्सवात उल्लेखनीय कार्य करणाऱ्या विविध घटकांचा गौरव करण्यासाठी पोलीस अधीक्षक कार्यालय, चंद्रपूर यांच्या वतीने दिनांक ३० सप्टेंबर २०२६ रोजी सायंकाळी पोलीस मुख्यालय, चंद्रपूर येथे भव्य सन्मान व प्रशस्तीपत्र वाटप समारंभ उत्साहात संपन्न झाला.

या कार्यक्रमाचे अध्यक्षस्थान मा. पोलीस अधीक्षक श्री. आयुष नोपानी (भा.पो.से.) यांनी भूषविले. कार्यक्रमास प्रमुख अतिथी म्हणून मा. आयुक्त श्री. अकनुरी नरेश (भा.प्र.से.), चंद्रपूर शहर महानगरपालिका, अपर पोलीस अधीक्षक श्री. ईश्वर कातकडे तसेच उपविभागीय पोलीस अधिकारी श्री. प्रमोद चौगुले यांची मंचावर प्रमुख उपस्थिती होती.

कार्यक्रमाचे प्रास्ताविक मांडताना उपविभागीय पोलीस अधिकारी श्री. प्रमोद चौगुले यांनी चंद्रपूर शहर व जिल्ह्यात गणेशोत्सवादरम्यान पोलीस प्रशासनाने राबविलेल्या उपाययोजना, नागरिकांचे सहकार्य आणि सामाजिक जनजागृती स्पर्धेमागची पार्श्वभूमी विशद केली. आपल्या मनोगतात मनपा आयुक्त श्री. अकनुरी नरेश यांनी सांगितले की, पोलीस प्रशासन, महानगरपालिका आणि नागरिकांमधील उत्तम समन्वयामुळे यंदाचा विसर्जन सोहळा कोणतीही दुर्घटना न घडता अत्यंत सुलभतेने पार पडला. समाजहितासाठी असा समन्वय कायम राहणे गरजेचे आहे.

” अध्यक्षीय भाषणात पोलीस अधीक्षक श्री. आयुष नोपानी म्हणाले की, सदर कार्यक्रमाचा मुख्य हेतून आभार प्रदर्शन असून उत्सवाचे पावित्र्य जपत सामाजिक भान वाढवणे आणि तरुणाईला योग्य दिशा देणे हा या उपक्रमाचा मुख्य उद्देश होता. चंद्रपूर जिल्ह्यातील सर्व गणेश मंडळे, शांतता समिती, पोलीस मित्र आणि जागरूक नागरिकांनी दाखवलेली शिस्त व प्रशासनाला दिलेले सहकार्य अत्यंत कौतुकास्पद आहे. कायदा व सुव्यवस्था राखण्यात जनतेचा हा सहभाग पोलिसांचे मनोधैर्य उंचावणारा ठरला आहे.”

*विविध घटकांचा गौरव व बक्षीस वितरण :*

चंद्रपूर जिल्हा पोलीस दलातर्फे आयोजित करण्यात आलेल्या ‘अमली पदार्थ विरोधी जनजागृती, ध्वनी प्रदूषण नियंत्रण आणि महिला सुरक्षा’ या विषयांवरील विशेष देखावा स्पर्धेत उत्कृष्ट कामगिरी करणाऱ्या गणेश मंडळांना मान्यवरांच्या हस्ते रोख पारितोषिके व सन्मान प्रशस्तीपत्रे देऊन गौरविण्यात आले:

– *प्रथम क्रमांक (₹ २१,०००/- व सन्मानपत्र)* हिवरपुरी बाल गणेश मंडळ, चंद्रपूर

– *द्वितीय क्रमांक (₹ ११,०००/- व सन्मानपत्र)* श्री विठ्ठल मंदीर वार्ड गणेश मंडळ, चंद्रपूर

– *तृतीय क्रमांक (₹ ५,१००/- व सन्मानपत्र)* श्री नवयुवक बाल गणेश मंडळ, दत्तनगर, चंद्रपूर

तसेच नियमांचे पालन करणारे पोस्टे चंद्रपूर शहर, रामनगर, पडोली, दुर्गापूर, घुग्घुस, वरोरा, भद्रावती आणि बल्लारपूर येथील विविध गणेश मंडळे व त्यांचे पदाधिकारी यांना सन्मान प्रमाणपत्र देवून गौरविण्यात आले आहे. त्याच प्रमाणे उत्सवादरम्यान अखंड सेवा देणाऱ्या खालील घटकांचा विशेष कृतज्ञता प्रशस्तीपत्र देऊन गौरव करण्यात आला:

– *चंद्रपूर शहर महानगरपालिका :* विसर्जन घाटांवरील स्वच्छता, प्रकाश व्यवस्था व चोख विसर्जन नियोजनाबद्दल मनपा आयुक्त श्री. अकनुरी नरेश व मनपा पथकाचा सत्कार.

– *महावितरण (MSEDCL) :* मिरवणूक मार्गावर २४ तास अखंडित व सुरक्षित वीज पुरवठा सुरळीत ठेवल्याबद्दल महावितरण अधिकाऱ्यांचा सन्मान.

– *डी.जे. व साऊंड सिस्टिम असोसिएशन :* मा. न्यायालयाच्या आदेशानुसार ध्वनी मर्यादेचे (Decibel Limit) व वेळेचे काटेकोर पालन करून पर्यावरणपूरक उत्सव साजरा केल्याबद्दल सन्मान.

– *शांतता समिती सदस्य व पोलीस मित्र आणि इको-प्रो-संस्था चंद्रपूर :* बंदोबस्तात प्रत्यक्ष मदत व सामाजिक सलोखा राखल्याबद्दल जिल्ह्यातील सर्व पोलीस ठाण्यांच्या हद्दीतील निवडक पोलीस मित्र व शांतता समिती आणि इको-प्रो-संस्था चंद्रपूर सदस्यांचा यथोचित गौरव करण्यात आला.

*अधिकाऱ्यांची उपस्थिती व आभार प्रदर्शन :*

या सोहळ्यास परि. पोलीस उपअधीक्षक तथा प्रभारी ठाणेदार भद्रावती, पोलीस निरीक्षक रामनगर, दुर्गापूर, पडोली, घुग्घुस, वरोरा व बल्लारपूर पोलीस ठाणे, सर्व पोलीस अंमलदार, गणेश मंडळांचे पदाधिकारी, शांतता समिती सदस्य व नागरिक मोठ्या संख्येने उपस्थित होते.